Өлтөхтөр Улуу Кыайыы Өрөгөйүн өрө күүрүүлээхтик көрүстүбүт
Улуу кыайыы 80 сылын көрсө, Уус-алдан улууҺун Өлтөх нэҺилиэгэр, Бэйдиҥэ бөҺүөлэгэр Кыайыы Өрөгөйүн өрө күүрүүлээхтик көрүстүбүт.
Сарсыарда 10.00 чаастан М.Н. Пестряков аатынан уулусса устун сэлэлии хаамыы ыытылынна, ол кэннэ Кыайыы 40 сыла уулуссанан Бэйдиҥэ эбэ кытылын устун хаамсан, Кыайыы болуоссатыгар муҺуннубут. 9 кылаас уолаттара кыайыы знамятын, ону тэҥэ Арассыыйа уонна Саха сирин былаа5ын өрө тутан киирэн, туруору астылар. Үрдүкү кылаас уолаттара георгиевскай лиэнтэнэн эритиилээх кыайыы гирляндатын өлбөт сүппэт ытыктабыл пааматынньыгар а5алан уурдулар, 11 кылаас уолаттара тэбис тэҥҥэ хамсанан, строевой хаамыыны көрдөрдүлэр, нэҺилиэкпит а5а баҺылыга Константин Анатольевич Алексеев Өйдөбүнньүк кутаатын уматта. Үлэ тыыл бэтэрээннэригэр сэмэй бэлэхтэр туттарылыннылар, сэрии о5олорун ааттарыттан Муниципальнай сулууспа туйгуна, ытык кырдьа5аспыт Анна Филипповна сэрии ыар кэмнэрин туҺунан иҺитиннэрии оҥордо, эйэлээх олох эригийэрин туҺугар ба5а санаатын эттэ. Оскуола о5олоро хоҺоон аа5ан доргуттулар, «Дьүөгэ» үҥкүү коллектива кыайыы үҥкүүтүн битийдилэр. Иван Иннокентьевич Румянцев Кыайыы ырыатын ньиргиттэ. Биир сэдэх көстүүнэн Олохтоох үлэ тыыл ветераннарыгар аналлаах стелла аҺыллыыта ыытылынна. Биир дойдулаахпыт буойун бэйиэт Иннокентий Артамонов «Мин мантан сэриигэ барбытым» хоҺоонун күргүөмүнэн аахтыбыт. Олохттоох фольклору үөрэтээччи, ийэ тыл сүмэтин илдьэ сылдьар, төрүт фольклору тар5атааччы Зоя Иннокентьевна Шепелева, өбүгэ са5аттан истэн илдьэ кэлбит Кыайыы оҺуохайын таҺаарда.
Дьэ ол кэннэ олохтоох норуот маастара, уран уус көмүс тарбахтаах Арыылаах бөҺүөлэгин төрүт олохтоо5о, ытык кырдьа5аҺа, сэрии сылын о5ото, Николай Гаврильевич Пестряков, бэйэтин ба5атынан чочуйан оҥорбут Кыайыы Катюшатын көрүү олохтонно, ба5алаахтар хаартыска5а түстүбүт, үөҺээ мэҥэ халлаан оройугар уот сулус кыымын, уоттаах салют эгэлгэтин ытан ньиргиттибит, Уруй-Айхал олохтонно. Саллаат хааҺытын амсайдыбыт.
Күнүс 3 чаастан олохтоох тэрилтэлэр үс хомуур хамаанданы туруоран, спорт тренера Леонид Дмитриевич Марков олохтообут эстафетатыгар кыттыыны ыллыбыт. Күрэх түмүгэр 1 бочуоттаах миэстэни МПЧ уонна Чэчир о5о уҺуйаанын хамаандата кыайыы өрөгөйүн үллэҺиннэ, 2 миэстэ5э олохтоох дьаҺалта, кулууп уонна библиотека хомуур үлэҺиттэрин хамаандата, 3 миэстэни оскуола коллектива ылары ситистэ.
КиэҺэ 7 чаастан, быйыл улууспутугар ыытыллыбыт «Уруйдуубут Улуу Кыайыыны» бэстибээл муҥутуур кыайыылаахтарын кэнсиэрэ, ол эбэтэр Өлтөх нэҺилиэгин олохтоохторун күүстэринэн туруоруллубут кэнсиэр хатыланна. Олус да үчүгэй тэрээҺиннэргэ сырыттыбыт, Улуу Кыайыы күнүн күргүөмнээхтик, өрө күүрүүлээхтик, ньиргиччи көрүстүбүт. Махтал буоллун бары тэрээҺин сүрүн тосхолун олохтоспут тэрилтэбит салайааччыларыгар, үүнэр көлүөнэ ыччакка, бар дьоммутугар.
Ба5арабыт өрүү ыраас сырдык эйэлээх оло5у.
Соннунарга анаан Өлтөх олохтоох прессата.
